سقصاني خويا البارح على راس الخيط، جاوبتو كيف لونو، ومن بعد سكتنا بزوج. اليوم عاود ثانيي جاني عامر سؤلآت وما عارف منين يبدى
عبدالله : خويا لله إيلاما غير قولي أشنو هو المعنى ديال هاد اللوحة و المقصود منها ؟
سعدون : غير شوف وارتاح، والباقي يجي وحدو
عبدالله : بغيتك غير تفهمني وتوريني المعنى والمقصود، الله يخليك
سعدون : غرضي باين ومقصودي واضح، غير الا كنتي تعميتي و ما بقيتيش تشوف
عبدالله : باللاتي، باللاتي، غير اتكلم وبعدها انا نفهم
سعدون : علاه الرسام خصو يتكلم باش عاد الشعب يفهم ؟
عبدالله : سامح لي، اللي ما فهمتيهش ضيعتيه، واللي فهمتيه اربحتيه
سعدون : آش هادي، أقوال زمان والا غير من وحي الساعة ؟
عبدالله : كيف بغيتي، انت الرسام و انا الشعب
سعدون : وعليه آسيدي، أنا نتلكم وانت تصغى لحديتي، متافقين ؟
عبدالله : متافقين
سعدون : أولا و قبل كلشي، منلي تلقى راسك قدام لوحة فنية بحال هادي، كيخصك تقدر عمل وجهد الفنان اللي دار باش يخرج هاد الواقع من المخيلة ديالو و يحطو قدام عينيك. الغرض من عمل فني بحال هذا، ماشي غير باش تشوفو و تتمتع وقيته بالنضر فيه، الغرض هو أنك تقراه بحال شي كتاب مفتوح على عالم آخر يلزمك تفهم القصة اللي كيروي الرسام فيه و الأسلوب اللي بناه بيه باش يتير فضولك و يخليك تسول آش هذا وآش الغرض و المقصود منو
المطلوب منك هنا هو ما تشوفش اللوحة بعينيك و لكن بفكرك وبعقلك، حيت الفن كيتشاف وكيتحس بيه. زيادة على هذا أن الفنان التشكيلي بحالي هدفو يقدم ليك احساسو الفني كرسم كيتسناك تتذوق ألوانو، حركاتو، سطورو، ضوؤو و تعيش مغزاه. أنا ماشي مصور فوتوغرافي باش نعطيك صورة طبقا للأصل لواقعك اليومي، باش تفهمها و باش نسهل ليك القضية، بالعكس غرضي هو نجعلك تهرس دماغك باش تخليه و تعودو يشوف اللي ماكايتشافش ويفهم باللي ما شي كلشي كيخصو يتفهم باش يتحب
من بعد هاد التفسير الطويل، سكت خويا سعدون واحد الثانية وبقى يشوف فيا، بحال يلا بغاني نأكد كلامو و فالأخر زاد
سعدون : واش فهمتي ؟
عبدالله : لوحتك غامضة بالحق تفسيرك وضحها لي ووضح لي معايرها وخلاني نشوفها بميزان آخر. تبارك الله عليك السي سعدون و على اعمالك. ما عندي ما نقول
بعد هاد المداكرة الصغيرة مع خويا عبدالله، والا كيشوف أعمالي بعينين اخرين وكيفهمهم بشكل آخر . ما بقاتش لوحاتي غير خطوط و ألوان، كيف كانت تبان ليه فالماضي، ولكن ولات أهداف ومعاني بحالها بحال شي كتاب مفتوح
